11:56 PM
Chhaidim77
ថ្ងៃព្រហស្បត្ត៏ ទី៣ ខែឧសភា ឆ្នាំ២០១២ ម៉ោង ១១:២៨
លោកប្រាក់ អរុណ
រាជធានីភ្នំពេញ ៖ លោកប្រាក់ អរុណ ក្នុងវ័យ២៦ឆ្នាំ ជាតារាចម្រៀងទើបរះថ្មីតាមរយៈការហ្វឹកហាត់រៀនច្រៀងនៅតាម ក្លឹបសិល្បៈ និងតាមរយៈការប្រឡងជាប់ចំណាត់ថ្នាក់ជ័យលាភីលេខ១ ក្នុងកម្មវិធីតារាមាសតន្ត្រីនៃស្ថានីយទូរទស្សន៍ប៉ុស្តិ៍លេខ៥ កាលពីឆ្នាំ២០០៨ ។ លោកមានស្រុកកំណើតនៅស្រុកកំពង់ត្រាច ខេត្តកំពត ឪពុកឈ្មោះមិន កុយ ម្តាយឈ្មោះប៊ិន យីម មានបងប្អូន៦នាក់ ស្រី៣ ប្រុស៣ លោកជាកូនច្បងនៅក្នុងគ្រួសារ ឪពុកម្តាយជាកសិករ ។
លោកប្រាក់ អរុណ បានចាកចេញពីស្រុកកំណើតពីឪពុកម្តាយបងប្អូនមករស់នៅក្នុង ទីក្រុងភ្នំពេញ កាលពីឆ្នាំ២០០៥ ដើម្បីបន្តការសិក្សា ។ ពេលនេះលោកកំពុងសិក្សានៅសាកលវិទ្យាល័យអាស៊ីអឺរ៉ុបឆ្នាំទី២ ផ្នែកគ្រប់គ្រង។ លោកប្រាក់ អរុណ បានប្រឡងជាប់លេខ១ ផ្នែកចម្រៀងសម័យក្នុងកម្មវិធីតារាមាសតន្ត្រីនៃស្ថានីយទូរទស្សន៍ ប៉ុស្តិ៍លេខ៥ ហើយក៏បានចាប់អាជីពជាតារាចម្រៀងប្រចាំនៅភោជនីយដ្ឋានផ្ទះ ម៉ែក្មេក ក្រោយមកបានប្តូរមកចម្រៀងនៅភោជនីយដ្ឋានតារាស្ប៉ា ក្បែរសាលាបាក់ទូករាល់រាត្រី ។ ទាំងនៅក្នុងភោជនីយដ្ឋាន និងច្រៀងនៅលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានា និងច្រៀងថតសំឡេងចូលស៊ីឌីលោកប្រាក់ អរុណ ជ្រើសរើសតែបទដែលជាកេរដំណែលរបស់រៀមច្បងលោកតា ស៊ិន ស៊ីសាមុត ។ បទចម្រៀងដែលលោកចូលចិត្តជាងគេនោះ គឺបទ «សុំផ្ទះអូនជ្រក» របស់លោកតា ស៊ិន ស៊ីសាមុត និងបទ «ភ្នំភ្លើងស្នេហា»របស់លោកសុះ ម៉ាត់ ។ ក្រៅពីច្រៀងបទពីសម័យ និងមុនថតសំឡេងចូលស៊ីឌីឱ្យផលិតកម្មក្រៅប្រទេសលោកប្រាក់ អរុណ ក៏មានបទថ្មីៗរបស់កវីនិពន្ធខ្មែរដូចជាបទ «ផ្សារជាវដួងចិត្ត» ដែលជាស្នាដៃរបស់លោកឆោម មន្នីជោតិ ជាអ្នកនិពន្ធទំនុកច្រៀង។ បទនេះលោកច្រៀងឱ្យផលិតកម្មជ្រលងបុព្វតា ក្រៅពីនេះនៅមានបទ «ទឹកចិត្តវរកងទ័ព» បទ «ចិត្តខ្មែរតែមួយ» បទ «បណ្តាំឪពុកម្តាយ» ដែលជាបទរបស់លោកអាត ទានមេត្តា ជាអ្នកនិពន្ធ ។
កំលោះខ្ពស់សង្ហារ១,៧០ម៉ែត្ររូបនោះ ក្រៅពីច្រៀងនៅតាមភោជនីយដ្ឋាន និងច្រៀងថតសំឡេងចូលស៊ីឌី និងច្រៀងជាកិត្តិយសនៅលើឆាកប្រគំតន្ត្រីចុងសប្តាហ៍តាមស្ថានីយ ទូរទស្សន៍នានាដូចជាប៉ុស្តិ៍លេខ៥ ប៉ុស្តិ៍លេខ៩ ប៉ុស្តិ៍លេខ៣ ប៉ុស្តិ៍បាយ័ន និងប៉ុស្តិ៍ CTN លោកក៏ជាតារាសម្តែងថតស្ប៉ត និងថតកាយវិការខារ៉ាអូខេតាមបទចម្រៀងរបស់ខ្លួនច្រៀងផងដែរ ។ លោកប្រាក់ អរុណ ម្ចាស់បទ «ផ្សារជាវដួងចិត្ត» ថ្វីដ្បិតតែពេលនេះលោកមិនទាន់អាចក្រសោបបេះដូងអ្នកស្តាប់នៅ ក្នុងប្រទេសបានច្រើនក៏ពិតមែន តែនៅ ក្រៅប្រទេសលោកទទួលបានការគាំទ្រពីបងប្អូនខ្មែររស់នៅឯក្រៅ ប្រទេសជាច្រើនព្រោះទឹកដមសំឡេងរបស់លោកច្រៀងបានពីរោះរណ្តំចិត្ត គួរឱ្យចង់ស្តាប់មិនចេះជិនណាយ ។
ទាក់ទងនឹងជីវិតផ្ទាល់ខ្លួនលោកប្រាក់ អរុណ បានឱ្យដឹងថា នៅថ្ងៃអនាគតលោកចង់ចាប់អាជីពជាតារាចម្រៀងល្បីឈ្មោះ ហើយចង់ក្លាយជាអ្នកជំនួញ ។ លោកថា ពេលនេះមិនទាន់គិតរឿងស្នេហានោះទេ ខំសិក្សាសិន ៕
0 comments:
Post a Comment